Sir 28

a28.2Md 6.14, Mg 11.25

b28.13-26Sir 51.2-6, Ya 3.5-12

1 Mbiralime wali agali bu karuhondo yolo ko miaga bu karu tini nde Anduane Homogo giha howa ko ngago mulebira. Ani bialu Anduane Homogohanda tinaga ko biyago embeda naholebira. 2 Wali agali maru bu karume í̠hondo ko birago mo embeda halu biadai nabi wahariyagua nde ko í̠ha ngago Anduane Homogohondo mo embeda halu domo wahai habe lalu bi larego ibugua hale halu domo waholebira. ^a 3 Wali agali maru karu baba keba ho hariyagua Anduane Homogohanda í̠ biamogo bia laregola í̠ mo bayale holebirabe. 4 Í̠naga damene karu dara nahaga hariyagua nde Anduane Homogohanda ko í̠na bini ngago domo waholebirabe. 5 Í̠ bame agali dege kegoni howa í̠naga miniha tandaga timbuni ho kego hadalu wanahariyagua nde í̠naga ko ngago aiwa domo waholebirabe. 6 Baya hangu mitangi bia. Í̠naga dindini holene ngago biba haragola homalu mo ko holebira. Anidagua bulebirago mitangi bialu í̠ninaga miniha waitigi holene hongo kego wahai halu Anduane Homogonaga mana ngago baya hangu talialu holene nga. 7 Anduane Homogonaga habo nalolene bi timbuni lo wini ngago mitangi bialu ibunaga bi mana ngini ngagobi mitangi bialu holene nga. Í̠na wali agali bu karu baba keba howa lai lolene ngago wahalu tigua í̠hondo lulu mana ale bialu karunaga miniha genda nahe habe.

Lai laganenaga mana ngago ogo

8 Mbiralime lai laragola í̠na bime lai lagalaga bialu irigi irigi beregola í̠naga ko ngago timbuniore holigo lai nalabe. Irane wali agalime keba howa lai lalu gungu biaga ka. 9 Wali agali mana ko biaga bu karume tinaga nenega bayale holene ngago mo ko halu wali agali bayale holene ngagoha waitigi holene mo yu anda ibalu mo ko hai haga ka. 10 Ira dene emene dedagoria ira dewa bo wima irigi haregola ira datimbu halu timbuniore haga nga. Anidagua dege wali agalime mine hayagua nde wai ogonime mo heya haga. Heneneore wali agali ti hongohe heagua nde tinaga keba holene pu timbu dege hagane nga. Anigo ti muni dewawi homogo heagua tinaga miniha tandaga timbuni ngago hongo howa latagi haga ka. 11 Wali agali keba abale tongo laga kagome mo ko halu bagabaga bulene mo wia halu biragola mbirali kago abale bope hagane nga. 12 Ira dene hagua bialu ngago pulope haregola ira datimbu hagane nga. Anigo ira dene emene hoailo ngago hamiaga toloba haregola ira hoailo wiyago abale hundu tegelo mina haga nga. Manane ogonibi dege kirabali í̠naga ne harigaha howa tagira ibagane nga.

13 Tí wali agali mege bialu hagabi ke̱ howa bi lagabi kemiru tíha pani nolene ko ngago anda ibulebira. Ani bulebirago irane tígua wali agali maru karunaga bayale holene wiago mo ko halu kemigonaga noleberemi. ^b 14 Mege beregome wali agali bo taliatogo lalu dindi tara tara ngaruha purogo lelagane nga ndobe. Ani bialu tano timbuni ngago bo gialahole bialu gabumane kago biba helaga nga. 15 Megenaga lini agali one wali bayale bedago ibu andagaha howa bo batagi halu tinaga biabe erekuibi bialu hayagonaga yolobi nami piaga. 16 Wali agali mende kagome ibu mege biyadago hale howa henene ledada lo manda biyagua nde ti kagoha hendore holenebi hadapaya bu holene nawigo. 17 Mbirali kago gewa tibume bayagua nde tinaga tinginini to halu dere biaga nga. Anidagua dege wali agali bi ko laga bu karume wali agali maru kagonaga hongo bope hai halu mo ereba hai helaga ka. 18 Wai biagane ayu tibu mini bainademe wali agali dewa homelo dibaganego ainde bi kome bolangua halu dewaore home laga nga. 19 Wali agali bi ko larago hale nahe baya hangu hogorale bu haga karu ti turu ho holene ngago irane tigua bi larago baya hangu manda nabi kagome turu holene nga. Tiha keba halu lai lene ngagonaga genda mbira yu ha nabini ka. Ani bialu ke̱ holenenaga ege pume gono ngagoha halu mbira do wianabini ka. 20 Mege biragonaga miniha genda timbuniore aeane gendabi ngagobi wialu hongo timbuniore ege pu hongohe ngagobi nga. 21 Mege biaganeme wali agali homelo bo waore haga. Ainde mbirale uruni nahondole ina ayu dege homolene karulapeda. 22 Bi ko ogonialeme wali agali tigabi karu bope halu irani da nabulebira. 23 Anigo wali agali Anduane Homogo yu wahalu piyaru minu yania halu ira hundia nabiaga dedagoria dai helolebira. Heneneore mege biaga mana ogonime laiono gabuame wali agali talima poradagua bialu biango dudume balu naradagua biagane nga.

24 De handaluore holene nga. Í̠ daluha yagi baya hangu gewa agubandu anihe ngarume pabe hagira hongohe bu yaanda howa, í̠naga muni ngolo siliba ngeru baya hangu mo do ho wibe. 25 Bi lararu bibahende miniha baya hangu mo tale biai halu í̠naga ne harigaha bi mbira loligo panga gedeni ho ndibulo wiagadagua ndibulo habe. 26 Í̠na bi ko mbira laregome í̠ni waitigi giha pilo ya holigo baya hangu mamage howa de hondo holene nga.